Intii gaariga la saarnaa miskaxdiisa waxaa isku haystay wixii uu
aaminsanaa iyo wanaaga uu dadkaan kala kulmay. Waxaa kale oo ka hor muuqdey
sheekooyinkii uu yaraantii maqli jirey ee jiib-siibka iyo qalinshubatada ahaa
ee magaalooyinka laga sheegi jirey.
Siday doonto ha noqotee gaarigii magaalada ayuu dhinac ka soo
galay, dadkiina waxay bilaabeen inay isweydiiyaan xaafadee dagantahay, gaari ma
kuu imaanayaa iyo taksi ma isla kiraysanaa.
Dabcan isaga xaafada magaceeda waa loo soo sheegay, nin ay hayb
kore wadaagaan oo uusan wajigiisa aqoona wuu ku dagayaa laakiin walwal badan
baa ka haya sida xaal noqon doono maadaama ay habeenimo tahay, magaaladana aanu
horay u aqoon.
Ugu dambayntii rag ay is ag fadhgiyeen ayaa ku yiri: annaga caawa
nala hoyo, subaxdiina aan kula raadino xaafadii iyo ninkii aad ku dagi lahayd.
Kaaga darane nimanku waa beeshii waligi looga digi jirey laakiin
maadaama ay muddo soo rafiiqeen, uuna ka arkay dhaqan wanaagsan oo uu rumaysan
la’aa geesinimo ayuu iska baaray, wuxuuna aqbalay inuu caawa iyaga martiyo,
sidaas ayaana xaafadii lugu tagey.
Salaan, soo dhaweyn iyo dajin ka dib cashadii ayaa la isugu yimid
rag iyo dumar, yar iyo weyn. Dariskiina dad badan baa ka yimid. Halkaas ayay ka
bilaabatay isbarasho iyo sheeko xiiso leh.
Ninkii martida ahaa waxaa dhakafaar ku noqotay hadalada uu caawa
maqlayo: Alla waa reer abtigay, ana isku jifo ayaan nahay oo halkaan baa la igu
qabaa, ana aabbahay abtigi weeye, ana walaalahay bay reer abti u yihiin,
magaalada uu ka yimid baan ku dhashay, saaxiibo badan baan ku leeyahay …
Dalkii iyo dadkii ka waran, waan u xiisay ciiddii iyo ehelkii,
berri annagaad noo casuumantahay, ha iga tagin innaga oo aan is arag hebel iyo
hebel baan hadiyad kuugu dhiibayaa, anigu waaba ku sii raacayaa iwm.
Maadaama uu xalay ka cudurdaartay casuumadii berri ahayd
subaxnimadii ayaa dadkii qofba wax u keenay: lacag la leeyahay waa casuumadii,
dhar, cataro iwm.
Quraacdii ka dibna xaafadii oo dhan baa isugu timid sagootintiisa,
waxaana lugu qaaday gaari gaar ah oo loogu raray alaabtiisii iyo hadiyadihii
loo keenay, waxaana sii raacay labadii nine e ay isla soo rafiiqeen iyo labo
dhallinyaro ah.
Horay xaafadii lagama geyn ee waxaa lugu soo wareejiyey magaalada,
meel kasta oo la marayana waa loo sharxayey. Meelaha caanka ah qaar ka mid ah
ayaa loo sheegayey in uu leeyahay nin beeshiisa ah ama mid reer abtigiis ah ama
qolada uu ka qabo ah, ugu dambayntiina inta baar laga siiyey cabbitaan iyo
cunto fudud, xoogaana loo sheekeeyey ayaa la siiyey telefoonada, waxaana lala
balamay in seddex beri ka dib laga soo wardooni doono, dabadeedna isagii oo
farxad iyo yaab ku kulmeen baa xaafadii la geeyey.
No comments:
Post a Comment